::: دليل شراء طابعة ثلاثية الأبعاد :::

قبل كل شي وقبل أي خطوة وحتى قبل ما تستفسر لازم تسأل نفسك هاي الأسئلة

خلي نجي هسه على احتمالات الاجوبة.
١- تقنية جديدة وأحب اتعلمها وأحب اواكب..
اذا لازم تفكر بطابعة متوسطة الحجم ( ٢٠ الى ٢٢ سم لطول ضلع المنصة )قليلة الكلفة، ليش؟ لان ٩٠ بالمية من النماذج ثلاثية الأبعاد ممكن تطبعها بطابعة حجم متوسط ونادرا ما رح تحتاج حجم اكبر من الحجم المتوسط.. وليش قليلة الكلفة؟ لان بالبدايات اكيد رح تصير اخطاء وبعض الاحيان تصير اعطال وحتى لا يكون تصليح هاي الاعطال مكلف.. لان اذا اشتريت طابعة غالية او كبيرة وخربت بيها شي رح تحتاج تدفع هواية حتى تصلحها ويجوز ما تحصل الشي اللي تريده او لازم تنتظر هواية.
وهم لا تهتم هواية بالمواصفات الثانوية اللي تساعد بعملية الطبع.. مثلا لا تهتم لتسوية المنصة الأوتوماتيكية… لان التسوية اليدوية بسيطة وتكسبك خبرة وما تكلفك فلوس اضافية على سعر الطابعة..
٢- اريد استفاد منها بشكل تجاري وافتح بزنس خاص بيا.. مثل الطباعة بفلوس او طباعة الماكيتات وغيرها…
شي حلو وتفكير مرتب.. هسه بعد مو منطقي ولامجدي انو تشتري طابعة متوسطة الحجم وقليلة الكلفة.. ليش؟
لان رح يجوك زبائن عدهم متطلبات خاصة.. حجم نموذج كبير.. قسم يريد دقة عالية.. او سرعة مثلا.. بهيجي حالة انصح بطابعة كبيرة الحجم مثل (٣٠-٣٥ سم لطول ضلع المنصة) وتحتوي على مواصفات مساعدة مثل حساس نفاذ الفلمنت.. حساس تسوية المنصة الأوتوماتيكية.. لان هالمرة رح تحتاج الوقت… وما يفيدك انو تضيع وقت مثلا بضبط التسوية اليدوية للمنصة الكبيرة نسبيا … ولمن عندك طلبات طباعة كبيرة ما رح تقلق بخصوص نفاذ الفملنت.. او استئناف الطباعة بعد انقطاع الكهرباء.. هاي الامور الثانوية.. هسه صارت مهمة لان رح تكسبك وقت.. والزبون اذا تاخرت عليه رح تخسره.. ولا تهتم لسعر الطابعة اذا كان عملك متقن وتعاملك جيد رح تطلع فلوسها بوقت قصير…
اسعار الطباعة مقابل فلوس بشكل عام بيها عدة معايير وعدة طرق لحساب الكلفة قسم على الوزن ( بين ١٠٠ الى ٢٥٠ دينار للغرام) او على الوقت (الساعة بين ٥ الى ١٠ الاف دينار) حسب النموذج
٣- عندي مشاريعي واريد انفذها… اني اسوي مشاريع الكترونية او اسوي قوالب نحت ..
تمام بهيجي حالة لازم تقدر الحجم اللي تحتاجه للطباعة لعملك او مشاريعك.. لان الحجم شي اساسي بتحديد السعر .. وايضا مسألة تحديد الوقت اذا كان مهم او لا.. لو كان مهم لازم تتجه للطابعات اللي بيها مواصفات اضافية.. حتى تكون مفيدة الك بتنفيذ اعمالك..
٤- اني احب اسوي مصغرات وتماثيل انمي وغيرها…
حلو بس هنا لازم نسولف.. دقة الطابعات ثلاثية الابعاد ما مناسبة للمصغرات .. هواية تفاصيل تضيع.. وغير عن هذا صعوبة طباعة تفاصيل المصغرات بهيجي حالة رح تحتاج شي دقته اعلى.. بده يتوفر عدنا بالعراق وهو طابعات الرزن السائل.. بس لازم تخلي بحسبانك انو الافضل تبدي بطابعة عادية وتتعلم وبعدين تنتقل للرزن.. وخلي ابالك..تقنية الرزن بشكل عام اغلى.. والمواد سامة وخطرة ويجب الحذر بالتعامل وياها.. وهذا كله غير انو حجم الطباعة ما زال صغير بالنسبة للطابعات العادية.. بس بالمقابل رح تحصل دقة ٥ اضعاف اعلى.. لذلك يستخدموها صياغ المجوهرات وتقنيين الاسنان.
ه- فقرة (ما انصحك)
ما انصحك تاخذ طابعة عملاقة بالحجم وانت بعدك مبتدء..
ما انصحك تاخذ طابعة متعددة الالوان وانت بعدك مبتدء..
ما انصحك تاخذ طابعة مستعملة اذا ما تقارن سعرها ويه الجديد بالسوك وفرق المواصفات.. و تشوف بعينك نموذج من الطباعة للطابعة المستعملة…
ما انصحك تشتري طابعة مبيها اسم موديل او من شركة ما معروفة..
ما انصحك تشتري طابعة موديل قديم.. رح تتعبك لان التوافق وياها بدا ينقرض وغراضها ما تحصلها بسهولة..

١- حاول تشتري من مكتب او شركة مختصة بالطابعات ثلاثية الأبعاد.. يعني مو عدهم مواد ثانية مثلا الكترونيات وكهربائيات وغسالات وبالمرة يبيعون طابعات وتروح تشتري منهم… لان اغلبهم ما فارغيلك وعدهم اقسام ثانية تشغلهم ويجوز ما عدهم مختصين وخبراء بالطابعات.
٢- لا تتورط وتشتري من الصين او الامازون.. لان الاسعار بالعراق بدت تصير نفس اسعار الانترنت وبلا ما تدفع ضعف فلوس الطابعة شحن وتنتظر شهر وشهرين..
٣- حاول تشتري من اللي عنده وكالة او ترخيص من الشركة المصنعة.. لان رح ينطيك ضمان الشركة وتكدر تشتكي عليه يم الشركة اذا ما وفرلك هذا الضمان.
٤- حاول تشتري من اللي يقدم خدمة زبائن جيدة او تدريب ويرد عليك بوقت سريع.. مو تكتبله وره اسبوع يجاوبك.. لو تعلقله ويكلك راسلنا لو ارجع اتصل بينا.. اتذكر دائما "الزبون دائما على حق" وانت دافع فلوس مقابل خدمة ومحد مسوي فضل عليك كزبون.
٥- حاول تشتري من مكان يعرض منتجاته بشكل واضح وصريح.. اسعار وصور وتفاصيل .. بدون اي غموض وبدون ما يكلك "راسلنا على الخاص".. يكولون بابلو اسكوبار جان يذيع اسعار المخدرات بالراديو.. وهنا عدنا يبيعون جراجف مال جرباية تسأله بيش يكلك الاسعار على الخاص…
لاحظت بعض المتاجر حاط تطبيق ويبيع ويكتب طابعة كبيرة طابعة صغيرة وحاط نفس الصورة الهم كلهم..
٦- لا تغتر بعبارات مثل احنا الارخص على الاطلاق او طابعاتنا رخيصة .. وتذكر دائما الرخيص يعني تعبان.. اذا مو المنتج فخدمة الزبائن تعبانة… او خدمات ما بعد البيع تعبانة او الخدمات المضافة تعبانة.. هذا الرخص لازم اكو شي سيء يقابله… اشتري من اللي ما يبالغ بمدح روحه او بضاعته..

١- بشكل اساسي.. تحتاج بس الفلمنت.. ودليل شراء الفملنت تلكوه بـ هذا الرابط

٢- ما تحتاج تشتري اي مواد احتياطية او قطع غيار.. الطابعة يجي وياها اهم القطع الاضافية اللي ممكن تحتاج تستبدلها بعد فترة.. مثل النوزل او تيوب الفلمنت..
٣- لازم يتوفر عندك كومبيوتر حتى تنصب عليه برامج التقطيع. ما يفيدك الموبايل.
٤- ما يحتاج تشتري اي برنامج.. برامج التقطيع المشهورة مجانية .. وموجودة بالانترنت وتجي نسخ منها بالطابعة.. وان شاءالله هم انشر موضوع عن برامج التقطيع
٥- وحدة من الشغلات المهمة انو تشتري حافظة بلاستيكية للفلمنت حتى تحافظ عليه ورح اشرح شنو السبب بمنشور الفملنت ان شاءالله.
٦- جهاز اليو بي اس او اذا طابعتك كبيرة تكدر تاخذ عاكسة.. علمود لا تتوقف الطابعة اثناء الطباعة.. صح اغلب الطابعات هسه تستأنف بس اكو مشاكل ترافق عملية الاستئناف وخاصة بكهرباء العراق..

١- تركب الطابعة حسب دليل التركيب بدقة وعناية ولا تجازف بتكهن طريقة التركيب.. حتى لا تصير مشاكل.. انتبه اغلب الطابعات بيها سويتج بالباور سبلاي يغير الفولتية حسب البلد ١١٠ فولت او ٢٢٠ فولت.. المفروص ببقى على ٢٢٠ فولت وما تغيره
٢- الافضل قبل ما تشتري الطابعة تعرف شلون تشتغل الطابعة وتتعلم عنها.. بس اذا اشتريت..فالمفروض قبل ما تبدي تجرب تطبع … انو تتعلم عنها سواء عن طريق كورس او يوتيوب.. لا تبدي تطبع قبل ما تتعلم. اكو امور مهمة تحتاج تعرفها وتسويها قبل ما تبلش
٣- كلش طبيعي بالبداية تخطأ وما تمشي الامور تمام.. اهدأ كلنا مرينا بهاي الامور.. وبمرور الوقت تبدي تتصلح الامور وتحصل نتائج حلوة..
٤- حافظ على الطابعة وخليها بمكان نظيف وبعيد عن الاتربة والغبار.. الطابعة بيها هواية فانات (مراوح) اذا عطلت بسبب التراب رح تخرب اجزاء الطابعة بهذا السبب او ما تطبع بصورة صحيحة.
٥- انتبه من قرب الاطفال عن الطابعة.. حرارة النوزل توصل ٢٦٠ درجة وهاي تسبب حروق عالية.. خليها بعيدة عن الاطفال
٦- الطابعة اربطها بمصدر كهرباء جيد ولاتعتمد على سيار رديء.. لان الطابعة بيها هيترات وبعض الاحيان تسحب تيار ٢ امبير قد لاسامح الله يسوي مشكلة اذا الربط سيء.

وبالختام نتمنالكم النجاح بهذا المجال ونتمنى انو هاي المعلومات الاساسية المتواضعة تكون مفيدة الكم او للي يريد يشتري طابعة… الطباعة ثلاثية الأبعاد فد شي كلش حلو وممتع وهو باب واسع للمستقبل..

نتمنالكم طباعة ثلاثية الأبعاد سعيدة..

شارك هذا الموضوع

Share on facebook
Share on twitter
Share on linkedin
Share on telegram
Share on vk
Share on whatsapp
Share on email
Share on reddit

نحن نستخدم ملفات تعريف الارتباط لنمنحك أفضل تجربة عبر الإنترنت. بموافقتك على قبول استخدام ملفات تعريف الارتباط وفقًا لسياسة ملفات تعريف الارتباط الخاصة بنا.

سلة المشتريات
  • لا توجد منتجات في سلة المشتريات