::: دليل شراء فلمنت الطباعة ثلاثية الأبعاد :::

السؤال الاول: شنو الغرض اللي احتاجه بالفلمنت؟
.
١- آني هاوي وأريد اتعلم واطبع هاي الشغلات الحلوة بالانترنت وشغلات اريد اصممها واطبعها.. تماثيل ومجسمات شخصيات وعمارات ومعالم وملاعيب العيد..
تمام بما انك هاوي وتحب تتعلم فلازم تعرف انو نوع الفلمنت المناسب الك هو ال PLA واللي هو الاكثر شهرة وانتشار بين انواع الفلمنت.. مرح اترجم رموز الحروف مالته لان ما اعرفها وما رح تستفاد منها… يمتاز هذا الفلمنت بسهولة طباعته.. والسهولة هنا يعني ينطبع بحرارة ١٩٠ الى ٢٢٠ درجة ويتلصق بسهولة مع بعضه وعلى المنصة واحيانا ما يحتاج منصة حرارية.. يعني منصة باردة هم يلتصق عليها.. وبعد يمتاز بتعدد الوانه واشكاله.. يعني بيه الوان اعتيادية هواية.. والوان بيها لمعان والوان بيها تدرجات وخشبي وشفاف ويتغير بالحرارة ويضوي بالظلمة وووو مايخلصن.. هذا غير انو سعره مناسب وبالمتداول.. يعني بشكل عام مناسب للمبتدئين.

بس هو كل حلو ما يكمل..ليش؟ لان من عيوبه انو ما يتحمل درجات حرارة الجو العالية.. يعني اذا تعوفه بالسيارة بشمسنا الحلوة تجي تلكاه متشوه ومايع… وبعد من عيوبه انو هشاشته اعلى من باقي الانواع… لانو مصنوع من مواد عضوية .. على الاغلب طحين الذرة (حتى نحافظ على البيئة ويكون آمن بالإستخدام) وبمرور الزمن يتاثر بالرطوبة وتزيد هشاشته… يعني لاتفكر تطبع اجزاء ميكانيكة او مساند رفوف او أجزاء تتحمل اجهادات بهذا الفلمنت… هذا النوع من البلاستك يجي باكياس محكمة الغلق ومفرغة من الهواء حتى لا يتعرض للرطوبة ويقصر عمره.. وانت هم من تفتحه وتتركه بلا استخدام لازم تحافظ عليه بمكان جاف مثلا تخليه بحافظه محكمة الغلق او كيس بلاستك غير نافذ..
.
٢- اني مهندس وهاوي مشاريع واحب سوالف ال DIY واريد اطبع اجزاء ميكانيكة وتعديلات منزلية ودعافيس لسيارتي..
بهيجي حالة رح تحتاج فلمنت بمواصفات اعلى من ال PLA خلي نشوف شنو متوفر وشنو مميزاته وشنو عيوبه..
عدنا ال ABS وهو ببساطة البلاستك اللي يتحمل حرارة جو اعلى يعني تكدر تطبع بيه الاجزاء اللي تريد تخليها بالسيارة او على رازونة شباك البيت بلا ما تموع وتتشوه.. الحلو بهذا البلاستك سعره بالعادة اقل من ال PLA وهم متوفر بعدة الوان.. ويمتاز بأمكانية صقله من خلال معالجته بالاسيتون.. لانو يتفاعل وياه.. بحيث نكدر نخفي خطوط الطبقات ونحصل على سطوح صقيله.. هذا الفلمنت هشاشته قريبة من ال PLA وعيبه هو بصعوبة طباعته نوعا ما لان درجة انصهاره قريبة من درجة تصلبه.. يعني احيانا اول ما يطلع من النوزل يتصلب قبل ما يلتصق على الطبقة اللي تحته.. لذلك لازم يكون الجو المحيط بالطابعة حار.. بالعادة يغلفون الطابعة ب enclosure واللي هي علبة تكدر انت تصنعها من الاكريليك الشفاف او حتى من الكارتون حتى تحافظ على حرارة الجو المحيط.. هذا البلاستك يحتاج حرارة نوزل بين ٢٢٠ الى ٢٤٠ درجة والمنصة بين ٨٠ الى ١٠٠ درجة…
عدنا كذلك ال PETG هذا النوع من البلاستك من عائلة ال PET وهو البلاستك اللي يصنعون منه قناني المي البلاستيكية وعلب الشامبو… يمتاز بتحمله العالي للاجهادات بحيث تكدر تصنع بيه اجزاء ميكانيكة وما تخاف عليها تنكسر بعد مرور فترة من الزمن… سهل بالطباعة يحتاج حرارة نوزل بين ٢٠٠ الى ٢٣٠ درجة وحرارة منصة بين ٦٠ الى ٨٠ درجة.. كمية الالوان المتوفرة بيه اقل وجماليتها مو مثل ال PLA .. شخصيا لاحظت بيها درجة شفافية بسيطة..
.
٣-اريد اطبع كفرات موبايلات واكتب عليها اسمي واخلي عليها تصاميمي.. او اسوي تايرات للسيارات المصغرة
رح تحتاج بلاستك مرن واللي يسموه TPU يمتاز بمرونته بشكل عام بس درجة المرونة تعتمد حسب الشركة المصنعة .. لا تتصور رح يكون بلاستيك مطاطي ولا رح يكون صلب.. بس هو بيه درجة مرونة.. صعب شوية بالطباعة بسبب مرونته ويحتاج تعديلات باعدادات الطباعة.. مشكلته انو الاكسترودر من يسحب الفلمنت او اللي نسميه retraction الفلمنت يحشر بداخله ويسوي مشاكل فوحدة من الحلول انو نطفي الريتراكشن ولازم يكون النموذج مالتنا قدر الامكان ما بيه travel هواية واللي هو حركة النوزل من مكان لمكان بدون طباعة حتى لا يصير عدنا شعيرات.. طبعا هذا شرح سريع تكدر تحصل ملعومات اكثر بالانترنت .. واكو طابعات تكون الطباعة بيه اسهل من غيرها…
هذا البلاستك مو كلش مناسب لصناعة الأختام لان مثل ما ذكرت انو مرونته مو مثل المطاط اللي يصنعون منه الاختام..
يحتاج حرارة بين ٢٠٠ الى ٢٢٠ درجة وحرارة المنصة هم تعتمد على نوع المنصة… نكدر نكول بين ٥٠ الى ٧٠ درجة..
.
٤- اريد اطبع اجزاء ميكانيكية وعليها ضغط واحتكاك يولد حرارة…
واحد من الانواع المشهورة بقوتها وتحملها للحرارة هو ال PA او النايلون.. هذا الفلمنت يجمع خصائص ال PETG و ال ABS رح يوفر الصلابة وتحمل الحرارة اللي تحتاجها بس بالمقابل رح يحتاج حرارة نوزل بين ٢٤٠ الى ٢٦٠ درجة وحرارة منصة بين ٨٠ الى ١٠٠ درجة.. وما يتوفر بالوان هواية.. تكدر تسوي منه مساند رفوف او اي قطعة منزلية تحتاج تحمل اجهاد. صعوبته مثل ال ABS اذا مو اصعب..
.
٥- اكو بعد هواية انواع من الفلمنت والي كل واحد اله استخدامات محددة.. رح نسولف على قسم منهم باختصار
كاربون فايبر.. هو PLA يمتاز بتحمل قوة أعلى بس مو كلش هواية والمميز بيه انو دقته عالية بالطباعة وينطي جمالية للنموذج
موصل الكهرباء.. هذا يجي PLA او ABS ومناسب للمشاريع الصغيرة والاغراض التعليمية
عدنا ال HIPS..وهو بلاستك خاص يذوب بمواد حامضية يستخدموه بطباعة المساند بالطابعات متعددة الالوان حتى يتخلصون من المسند بسهولة وبدون ما ياثر على جمالية النموذج..
ومثله ال PVA بس هذا يذوب بالمي ويستخدم لنفس الغرض..
….
السؤال الثاني: منين وشلون اشتري الفلمنت؟
.
١- اشتري الفلمنت من مجهز معروف ويعرض اسم ماركة الفلمنت.. لان الشركات المعروفة تنطي شهادات جودة بمنتجاتها.. وحاول تشوف هذا الفملنت موجود بالامازون؟ وشكد سعره بالامازون وقارن الفرق..
.
٢- لا تشتري فلمنت بدون اسم شركة على العلبة.. بالعادة هذا فلمنت رديء ولا يغرك السعر الرخيص..
.
٣- لا تشتري فلمنت قديم كلش او ستوك .. لان بعض الاحيان ظروف الخزن تتلف الفلمنت..
.
٤- قبل ما تشتري الفلمنت افحص الكيس المفرغ من الهوا.. خو ما مثقوب .. لان الرطوبة رح تتلفه.. لا تشتري فلمنت مفتوح ابدا..
.
٥- اتاكد من اللون الي تريد تشتريه.. شوية موضوع الالوان مزعج لان درجة اللون تختلف من شركة لشركة.. والشركات بالعادة يصنعون تدرج واحد او اثنين او تلاثة لكل لون.. فلا تتصور انو بسهولة تلكا اللون اللي ابالك…واذا عندك مشروع او نموذج كبير تريد تطبعه بلون واحد وتحتاج اكثر من لفة فلمنت.. اتاكد انو الكمية اللي رح تشتريها تكفي قبل ما تبدي.. لان احتمال اذا خلص اللون ورحت تشتري ما تلكاه نفسه..
.
٦- أحيانا لمن تشتري طابعة مستعملة يعرضون وياها فلمنت مفتوح.. كون حذر من هذا الفلمنت .. صاحب الطابعة يضيف سعر علمود هذا الفلمنت او يعرضه كميزة اضافية ويه الطابعة.. ويكلك ما مستخدم منه هواية.. لا تشتريه ..مشاكله اكثر من سعره.. لان تلكا صاحب الطابعة على الاغلب صارله فتره تاركها وما يطبع بيها وهذا الفلمنت انترك فترة طويلة مفتوح.. الفلمنت المفتوح احتمال يتكسر عندك بالطباعة ويسويلك انسدادات ومشاكل..
…….
السؤال الثالث: هسه اشتريت الفلمنت.. شسوي؟
.
١- اهم شي بعد ما تشتري الفلمنت انو ما تفتحه من الكيس المفرغ من الهوا اذا ما رح تستخدمه.. حتى لا يتلف..
.
٢- اشتريلك حافظة بلاستيكية كبيرة مال اكل واحفظ الفلمنت بيها واذا كان الغطا مالتها مو محكم.. يعني يعبر هوا تكدر تخلي على إطار الغطا شريط الفوم اللاصق اللي يبيعوه بالأنشائيات واللي يستخدموه للابواب والشبابيك.. .واذا ما كدرت توفر حافظة.. خليه باكياس محكمة الغلق.. وبشكل عام حافظ عليه بمكان جاف.
.
٣- احتفظ باكياس السيليكا الصغيرة اللي تجي ويه الفلمنت وخليها بهاي الحافظة حتى تمتص الرطوبة قدر الإمكان..
.
٤- لا تترك الفلمنت على الطابعة فتره طويلة وتجي تطبع بيه مباشرة.. جونا مترب وذرات الغبار اللي تصير على سطح الفلمنت تدخل للنوزل وتغلقه وتسوي مشاكل بالطباعة.. نظف الفلمنت من الغبار بمنفاخ او اطبع القطعة اللي يخلون بيها قطن او اسفنج حتى تنظف الفلمنت قبل ما يدخل للاكسترودر… انتبه.. لا تخلي قطن او كلينكس بشكل مباشر على الفلمنت لان مرات يروح للاكسترودر وينسحب ويه الفلمنت ويسوي مشاكل..
.
٥- لا تغسل الفلمنت ابدا 😁..
.
٦- اكو اجهزة تمتص الرطوبة من الاكل.. يعني تجففه.. ممكن ترتبها او تحورها بشكل ما حتى تسحب الرطوبة من الفلمنت القديم واكو اجهزة مثلها مصممة للفلمنت تقدر تشتريها اذا توفرت..
٧- من تكمل من استخدام الفلمنت وتريد تخزنه.. تأكد انو بداية الفلمنت تخليها بالمكان المخصص الها بالبكرة.. لان اذا فلتت احتمال يعبر من تحت لفة ثانية ويحشر عندك بالطباعة…
….
نتمنالكم طباعة ثلاثية الأبعاد سعيدة

نحن نستخدم ملفات تعريف الارتباط لنمنحك أفضل تجربة عبر الإنترنت. بموافقتك على قبول استخدام ملفات تعريف الارتباط وفقًا لسياسة ملفات تعريف الارتباط الخاصة بنا.

سلة المشتريات
  • لا توجد منتجات في سلة المشتريات